Thought of The Night:
British Navy used Britney Spears Songs to scare off The Somalis Pirates!!
I don’t blame both of them ,The Navy for their good taste of hating Britney Spears Music and The Somalis to be scared of her music!
This version of Toxic is a very good proof compared to Britney’s Version!!
Good Night and, Good Luck and Happy Halloween!
معاليك على الدار……
طلع ڤيديو إمبارح، حديث للدكتور محمد نوح القضاة – معاليه سابق -، وبغض النظر عن رأي الشخصي فيه، بس الحق يقال الرجل أحسن من كثير من المعالي الي السابقين إلي مروقوا مرور الكرام على الوزارات وصاروا معالي فقط بدون أن يعملوا أي شيئ ثاني يذكر…..
الموضوع عن قصة حصلت معه أيام ما كان معاليه وعلى رأس وزارته، وفيها كشف لكثير من الأمور إلي فيها فساد بس العالم بيعملوها بغض النظر، زي ما هو نفسه بقول بالڤيديو، تحت مسمى القانون!
نقاشه عن الحرام والحلال كمنطق – بغض النظر منطق ديني أو لأ – هو نقاش صحيح لإنعدام الأخلاق طالما القانون يحمي هكذا أخلاق التي تؤدي دائماً لفساد قانوني لا يعاقب عليه القانون ويمس بطريقته، من أصغر موظف بالدوائر الحكومية لمعالي الوزير بأتخن وزارة.
سؤالي لمعاليه السابق؟؟؟ طيب معاليك لما كنت معاليك، وإجى مديرك المالي وقلك عندي ٧٠٠ ألف زيادة، ومزحت معه وقلتله على الدار، وبعدين عاتبته عن الحرام والحلال ورضى الله ……..ممكن أعرف ليش ما بلغت عنه مكافحة الفساد علشان يأخذوا إجراء بشخصية عم بتسهل الفساد “قانونياً”؟ هل عملتله مجلس تأديبي؟ هل طالبت بإحالته على التقاعد مبكراً ….أضعف الإيمان؟؟؟
الإجراء إلي أخذته بتوبيخك إله بأن هذا حرام والله ما بيرضى فيه، هو نفس المنطق إلي هو إجالك منه وقلك هذا قانوني…..يعني لا إنت صحيتله ضميره بالحلال والحرام، ولا هو صحي ضميره لأنه عم يمشي حسب القانون وحمايته له!!!!!
معاليك…..اليوم إنت إلي رجعت على الدار، وأظن وأغلب الظن مديرك المالي لسة بموقعه، وأغلب الظن واحد من إلي بعدك ما رح يقوله حرام وأظن رح يقوله بس كلمة ……كاش!
وهنا تكمن العلة في الفساد، إلي حتى بفرصة وجود شخصية محترمة مثلك (حسب ما بسمع، أنا ما بعرفك)، كل إلي عملته كمسؤول أمام الشعب إنك نهيت عن المنكر وأمرت بالمعروف، في ظل دولة تعمل بالقانون وليس دولة خلافة، وبالتالي المنكر إلي نهيت عنه قانوني والمعروف إلي ما أمرت فيه غير قانوني، وكان ممكن تعمل سابقة درس للموظفين في وزارتك كلها عن معنى الأخلاق في ظل القوانين المدنية إلى أن يتذكرنا الله ويحاسبنا على أخلاقنا السماوية بما يخص الحلال والحرام……….وبناء عليه خليك بالدار أو بالبرامج الدينية وما تقبل منصب مرة ثانية إلا إذا بدك تطبق دينك وأخلاقك في ظل القانون المدني وتعاقب قانونياً ومش بس تنهي عن المنكر!
(يحضرني بهذه المناسبة، المجرم الأمريكي المعروف “أل كابون”، إلي ما حدى قدر يمسك عليه أي شيئ مع إنه الكل بأمريكا في العشرينات كان بيعرف إنه هو رئيس أكبر عصابة ومعجب عليهم، إلى أن قدروا يمسكوا “مديره المالي” ودفاتره المالية!!!!!!)
Thought of the Night:
Last weekend, I spent the afternoon watching this amazing movie “Planet Ocean” and as the narrator says……we have become a super predator.
Worth watching, thinking about and start acting individually even……
Good Night and…..Good Luck!
وحش بحيرة نِس!
أسطورة وحش البحيرة إلي بأسكتلندا، إنكشفت بعد ما أعترف المصور صاحب أحسن لقطة للوحش وإلي بناء عليها زار البحيرة ملايين من السواح، وإنكتب مليون كتاب، وإتصور مليون فلم وثائقي، وإنعمل مليون بحث علمي عنها، وطلعت خدعة عملها المصور مع صديقه صاحب مكتب السياحة في منطقة البحيرة، لغرض إجتذاب السواح وإحياء المنطقة ووضعها على الخارطة.
طبعاً السر كان إله أكثر من ٦٠سنة مخبأ بينهم (تخيل لو كانوا نسوان……كان إنجلطوا من أول أسبوع!!!). المصور وصاحبه ما أبدوا أي ندم ولا تأنيب ضمير إنهم ضحكوا على العالم بكل أطرافه بخصوص موضوع الوحش، لأنهم كانوا مبسوطين على الموضوع وثانياً بلدهم عملت دخل من ورا هذا الفلم بدون ما يدفعوا فلس أحمر، وبدون حتى ما يحطوا دخولية للبحيرة مقدارها ٦٠ دينار أردني كحد أدنى!
يعني مُش بس الكذب ملح الرجال يا جماعة ، الكذب ممكن يكون ملح الإقتصاد كمان؟!
عنا هون في “المستنقع الأردني الإقتصادي”، عنا وحوش حقيقية، ما عملها مِتعب وصقر وفتى الجبل، عملتها الطبيعة والتاريخ؟ عنا وحش البتراء، وحش من عجائب الدنيا السبع، عنا البحر الميت وحش أخر ما في منه وحقيقي للنخاع، عنا وادي رم وحش مُخيف بجماله، وعنا كل الأشياء إلي عنا إياها في كُل زاوية وشبر في الأردن……..
بس ما عنا:
١- واحد مثل المصور وصاحب مكتب السياحة مستعدين يعملوا شيئ علشان كل السكان والبلد تستفيد ومش بس هُمْ.
٢- ما عنا كذابين – كذب أبيض – عنا كذابين ونصابين وإنتهازيين، بدهم يستغلوا ويحلبوا النملة من هيك مواقع، حتى لو إستغلالهم هذا رح يؤثر على الباقين من إلي بينتفعوا بهيك مواقع بمجرد إنها موجودة عنا!
يعني علشان الغير عاملين بالمجال السياحي في الأردن يفهموا (لأنه العاملين فاهمين …..وقرفانين)، زي ما تقول إنك تروح على تركيا وتدفع دخولية يمكن ٥ يورو علشان تزور آيه صوفيا، وتدفع بنفس الوقت ١٠٠ يورو بالمحلات والمطاعم إلي حوالين آية صوفيا، وعنا بتدفع كأجنبي سايح ٦٠ دينار على الأقل علشان تزور البتراء ونصف دينار علشان تشتري زُجاجة مياه بلاستيك باردة فقط خلال زيارتك…….
الوحش إلي عنا الحقيقي هو البيروقراطية، قصر النظر و المربح السريع اليوم بدل المربح القليل المُتنامي والمستمر، وهذا هو الوحش إلي بيعرفونا فيه كثير العالم الخارجي لما يحكوا عن أقبح المدن، أو عن ترتيب الأردن من ناحية الفساد، أو لما صندوق النقد الدولي يستغرب كيف عنا كُل هاي الكنوز السياحية ومع ذلك يوروديزني المصطنعة عم تعمل مصاري أكثر من الأردن كاملةً (ما قارنت مع ديزني وورلد علشان وزير سياحتنا الأكرم ما ينجلط!!!!!!)
Thought of The Night:
Estimated 1.8 Billion Mobile phone will be sold by end of 2013 with a 400us$ average price per phone and an average bill of 15us$ a month. So total spend world wide on this industry alone is 1Trillion and 44Billion us$ In 2013!
Literally…….Money where your mouth is!!!
Good Night and…..Good Luck!
الجوهر والمظهر…..
ملاحظة مهمة جداً، كيف كل الدول اليوم التي بالنسبة لنا دول متحضرة وجميلة وبنتمنى تزورها أو نعيش فيها، تركوا التراث تبعهم من ناحية اللبس والعادات والتقاليد وقدروا يتطورا ويطوروا التراث والعادات والتقاليد لتصبح عصرية ومتناسبة مع تطور التكنولوجيا وسرعة الحياة الجديدة……
يعني علشان أشرح بشكل أزبط، محلات البيتزا في إيطاليا، غيرت الفرن القديم، غيرت الشيڤ الختيار “أبو تمبة”، غيرت الست الطليانية إلي بتخدم وغيرت كراسي الخشب القديمة، وإبريق المي القديم ……بس ما تغير طعم البيتزا؟؟؟
الأوتيل إلي كنت قاعد فيه “أنا وأنجلينا”، عمره ٦٠٠ سنة بلا مؤاخذة أكبر من المملكة الأردنية الهاشمية وكثير من دولنا العربية……تغير الحمامات وصارت عصرية، أضافوا مصعد إله، عملوا بار، عملوا مطعم على التاراس، بس اللوحات إلي على الحيط، هي نفس اللوحات إلي على الحيط إلي كانت موجودة لما بنوا المبنى أصلاً، غير طبعاً المنظر العام إلي فعلياً هو هو من ٦٠٠ سنة لغاية كمان أظن ٦٠٠ سنة لقدام!!!
هون الفرق، نحن بنحاول نحافظ على الجوهر بعاداته وبدائياته وإنتهاء صلاحيته وبنلعن أبو المظهر بالكامل وبنعمله عصري لأبعد حدود بس للأسف بضل الجوهر تبعه قديم بقدم عاداتنا إلي ما تغيرت من آلاف السنين، وبالتالي تحضرنا وتطورنا ظاهري ومثل البيت الزجاج حجر صغير بيكسره وبيبقى معنا البدائية في العادات والتقاليد فقط!!
علشان هيك مش عم نقدر نلحقهم بالتطور ودائما بنلوم الإقتصاد والقوانين والعلم، مع إنه إحنا برضه عنا إقتصاد في كثير من دولنا أحسن من اقتصادهم، عنا علم بكميات وعنا قوانين برضه مشابهة، بس الشيئ الوحيد الي ما عنا إياه هو تطور الجوهر حتى يتماشى مع المظهر……..#بس بقول!!
Thought of The Night:
We are missing on so many things in life, cause we are misperceiving so many things in life!
Good Night and…..Good Luck!
تنويه….
شوفوا حبايبي؟؟!!
زينة، بنتي الكبيرة الله يخليكم لأهلكم، مواليد ٢٢/٧/١٩٩٥، درست في المونتسوري، وإحنا سكان دابوق، وصحابي الأنتيم معروفين ومعروفين أولادهم…..هذا أولاً
ثانياً: أنا لما صار عمري ٢٠ بدأ شعري يشيب، مش عارف هو وراثة الموضوع ولا مياه ملوثة زيادة عن المعدل….المهم الشيب بدأ معي وأنا صغير
ثالثاً: معروف عني بمزح وبضحك وبعمل أفلام بأصحاب أولادي وخوش بوش يعني
لذلك، إذا يا حبيبي ويا حبيبتي، إنتوا إكبر ولو حتى بيوم من أكبر بنت عندي “و” ما درستوا معها بنفس الصف “و” مش بالحارة عنا “و” لا إنتوا أولاد أصحابي الأنتيم، وإذا عارفين إنه الشعر الأبيض أسبابه ممكن تكون وراثية أو تلوث بيئي “و” مش مازح معكم بمراحل عمركم من يوم واحد لحد ما صرتوا قد أكبر بنت عندي……..كيف وبأي عين وبأي منطق بتقولولي ……عمو؟؟؟؟ (لاحظوا إني إستعملت “و” مش “أو”)
أي عمى الدبب منك إلها وإذا بدك تقول عمو لا تطلب تجتمع معي على أساس إنٓك أو إنِك صرتوا ما شاء الله كبار، خليك بالمدرسة لحد ما تحس حالك كبرت أول وتبدأ تطلع من موضوع عمو وطنط وأنكل …….عمى يعمي إلي خلفكم عن جد، حسستوني عمري……..٢٥ ونص :((((
Thought of The Night:
Can’t Imagine what would have Archimedes shouted if the good idea came to him, setting on his toilet seat rather than floating in the bathtub? Eurekaka, I guess!!!
But seriously, Good ideas come in the least expected times, locations and yes…..seating position ;))))
Good Night and……Good Luck!
رابع المستحيلات……
الثلاث المستحيلات إلي قبل هما، الغول والعنقاء والخل الوفي، وطبعاً هدول كانوا مستحيلات لما كان التلفزيون أبيض وأسود، والكافي شوب هي درج العمارة أو رصيف الشارع، وبرابيرك نازلة ماكنتش عيب…عادي، وتلفون البيت كان القرص الدوار إلي ياما علق أُصبعك فيه، وما كان نعرف غير فريق الحارة وهو كان على مستوى اليوم أهم بكثير من برشلونة، وصح النوم كانت قمة فهمنا السياسي هذا إذا قدرنا نعرف ماذا يجري في البرازيل علشان نعرف ماذا يجري في الصومال……..
اليوم، تغير الوضع من كثر الرضع، والمستحيلات كمان تغيرت وصارت:
الغول: حالة هستيريا غريبة كل ما يلعب هالفريقين:
١- إنه تمرق مباراة لبرشلونة ومدريد بدون ما أعرف إنه أُمك وأُختك وخالتك وجارتك برشلونية أو مدريدية وبدون ما أشوف النتيجة كُل ثانية وبدون ما أشوف تحليل أهلك عن الضربة إلي ضربها ميسي، في الوقت إلي علاقتك بكرة القدم لا تتجاوز متابعتك لحلقات كابتن ماجد بنفس الوقت إلي برابيرك كات تنزل على تُمك وتطلع إنه ما حدى شايفك وتأخذ لك لحسة ذوق جست فور ذا هيك أوف إيت إو لأنك مقلعط من يومك………
العنقاء: حرقوا الواتس أب بخمس دقايق بعد ما كانوا بيعبدوه وطلع من الحريقة البي بي إم:
٢- إنك تلاقي عربي خلال الأسبوع الماضي ما بلغ الدنيا ومن فيها برقم ال BBM تبعه…..يا أخي ما بدي أببملك، خاوة هي القصة؟؟ وأنا أصلاً ما رديت على واتس أبك ولا على إيميلك ولا على بوكاتك ولا لايكاتك ولا حركاتك، فليش تقلعطني برقم بي بي ……..إمك “بلا قافية”
الخل الوفي: إلي حبوه كرهوه وإلي كرهوه حبوه….يا لهوي:
٣- إنك تلاقي مصري بحب باسم يوسف ماسبش على باسم يوسف لأنه صار إخوان ومصري ما بحبش باسم يوسف ما سبش على باسم يوسف لأنه من جماعة السيسي…..بعد مشاهدة نفس الحلقة؟! أظن لازم يعمل حلقتين بالأسبوع (الجمعة مع السيسي والثلاثاء مع الإخوان، علشان باقي العقل إلي عند إخوانا المصريين ما يضربش)
ورابع المستحيلات عن جد عن جد، إنه سعودية تسوق سيارتها بالبرقع، إحنا إلي عنا بلا برقع والشباب ماشيين حراسة حواليها وتفضلي يا أمورة والذوق كله علشان تمرق قبل، وداخلين ومدخلينا بالحيط؟!
طيب ماشي رح أكون مع جمعية الدفاع عن المرأة وأقول مُش مستحيل، بس بشرف الغالين عندكم تخيلوا……الدنيا ليل، ما في ضؤ بالشارع، سيارة سوداء، وباتمان سايق سيارة قدامك؟؟؟ لا غول ولا عنقاء ولا خل وفي ممكن يعمل معك شي بهالحالة….
(في كمان سابع المستحيلات على فكرة بس هاي إلها حلقة خاصة: إنه دولة عبدالله النسور طلع بشقلب الكلام من وهو صغير، وكل ما كان يقول إرفع، كان يكون قصده …….نزِل!!!)
Abu Alnoon 