وحش بحيرة نس

وحش بحيرة نِس!
أسطورة وحش البحيرة إلي بأسكتلندا، إنكشفت بعد ما أعترف المصور صاحب أحسن لقطة للوحش وإلي بناء عليها زار البحيرة ملايين من السواح، وإنكتب مليون كتاب، وإتصور مليون فلم وثائقي، وإنعمل مليون بحث علمي عنها، وطلعت خدعة عملها المصور مع صديقه صاحب مكتب السياحة في منطقة البحيرة، لغرض إجتذاب السواح وإحياء المنطقة ووضعها على الخارطة.
طبعاً السر كان إله أكثر من ٦٠سنة مخبأ بينهم (تخيل لو كانوا نسوان……كان إنجلطوا من أول أسبوع!!!). المصور وصاحبه ما أبدوا أي ندم ولا تأنيب ضمير إنهم ضحكوا على العالم بكل أطرافه بخصوص موضوع الوحش، لأنهم كانوا مبسوطين على الموضوع وثانياً بلدهم عملت دخل من ورا هذا الفلم بدون ما يدفعوا فلس أحمر، وبدون حتى ما يحطوا دخولية للبحيرة مقدارها ٦٠ دينار أردني كحد أدنى!
يعني مُش بس الكذب ملح الرجال يا جماعة ، الكذب ممكن يكون ملح الإقتصاد كمان؟!
عنا هون في “المستنقع الأردني الإقتصادي”، عنا وحوش حقيقية، ما عملها مِتعب وصقر وفتى الجبل، عملتها الطبيعة والتاريخ؟ عنا وحش البتراء، وحش من عجائب الدنيا السبع، عنا البحر الميت وحش أخر ما في منه وحقيقي للنخاع، عنا وادي رم وحش مُخيف بجماله، وعنا كل الأشياء إلي عنا إياها في كُل زاوية وشبر في الأردن……..
بس ما عنا:
١- واحد مثل المصور وصاحب مكتب السياحة مستعدين يعملوا شيئ علشان كل السكان والبلد تستفيد ومش بس هُمْ.
٢- ما عنا كذابين – كذب أبيض – عنا كذابين ونصابين وإنتهازيين، بدهم يستغلوا ويحلبوا النملة من هيك مواقع، حتى لو إستغلالهم هذا رح يؤثر على الباقين من إلي بينتفعوا بهيك مواقع بمجرد إنها موجودة عنا!
يعني علشان الغير عاملين بالمجال السياحي في الأردن يفهموا (لأنه العاملين فاهمين …..وقرفانين)، زي ما تقول إنك تروح على تركيا وتدفع دخولية يمكن ٥ يورو علشان تزور آيه صوفيا، وتدفع بنفس الوقت ١٠٠ يورو بالمحلات والمطاعم إلي حوالين آية صوفيا، وعنا بتدفع كأجنبي سايح ٦٠ دينار على الأقل علشان تزور البتراء ونصف دينار علشان تشتري زُجاجة مياه بلاستيك باردة فقط خلال زيارتك…….
الوحش إلي عنا الحقيقي هو البيروقراطية، قصر النظر و المربح السريع اليوم بدل المربح القليل المُتنامي والمستمر، وهذا هو الوحش إلي بيعرفونا فيه كثير العالم الخارجي لما يحكوا عن أقبح المدن، أو عن ترتيب الأردن من ناحية الفساد، أو لما صندوق النقد الدولي يستغرب كيف عنا كُل هاي الكنوز السياحية ومع ذلك يوروديزني المصطنعة عم تعمل مصاري أكثر من الأردن كاملةً (ما قارنت مع ديزني وورلد علشان وزير سياحتنا الأكرم ما ينجلط!!!!!!)