الفلم الهندي….
الي بيحضر أو حضر فيلم هندي بحياته – مع إنه إقتصاديات الفلم الهندي تكاد تتعدى إقتصاديات هوليوود – ما بيقدر إلا إنه يتمصخر على الهبل، وعلى طريقة التمثيل، وطريقة الدوبليير، وطريقة الأكشن والإخراج، ومع ذلك بضل يحضر الفلم لنهايته، لأنه من كثر الهبل، بصير المشاهد بدوا يشوف اذا لسة في أهبل من الي شافه لنهاية الفلم ؟؟؟
بتصور إذا مثلاً طلعت على بومباي، أول شيء رح أعمله إني بدي أروح أحضر فلم هندي أكشن، جوة سينما تكون معجوقة ومعبية هنود؟؟ بدي أشوف لما شروخان يطير بالهوا، ويضرب ٥٠ واحد برجل وحده، وقبل ما ينزل على الأرض عيونه تضرب بعيون حبيبته بتصوير بطيء، وبنفس الوقت تصوير سريع للأحداث الي مرقت بحياته، وخلال اللقطة ينضرب سكين وسيف ورصاصة وشاكوش، وبرضه ينزل ويعيش على الأرض ويتزوج أمه بالآخر…..بدي أشوف كيف الهنود عم يتفاعلوا مع الفلم، وكيف بهللوا وكيف بزقفوا وكيف بيبكوا وكيف بصفروا، وبدي أهم من هيك أشوف أنا كيف رح أهلل، وكيف رح أزقف، وكيف رح أبكي وكيف رح أصفر…..على نفس الفلم الي حضرته قبل لحالي، وقلت عنه أهبل؟؟؟؟؟
ما تهتموا للحكي الي فوق…..كملوا زي ما انتوا!!!
Abu Alnoon 