TAYASEH 1.0

TAYASEH 1.0…

بتعرف ليش وصف الإرهاب لصق فينا كعرب أكثر من غيرنا، مع إنه التاميل كانوا إرهابيين، الصربيين كانوا إرهابيين، الإيرلنديين إرهابيين، الإسرائيلية آرهابيين وكثير من الشعوب إجت عليهم فترات كانوا فيها أشد إرهاباً (حتى الفرنسيين والطليان والإنجليز كمان) من الإرهاب الإسلامي أو العربي الحالي؟
ليش لأنه الإرهاب بالنسبة للعربي هو نمط حياة ومش موضوع طارىء بسبب وضع معين على الساحة؟ احنا إرهابيين فكريين وإجتماعيين وماليين وحتى رومانسيةً إحنا إرهابيين في تعابيرنا المجملة……
اذا بتحب وحدة وما بدها إياك ، بتروح بطخها أو بطخ حالك او حتى لما وحدة بتعبرلك عن حبها بتقلك “تقبرني”….إذا واحد رش مي قدام دكانتك بتطلع بتضربه…..إذا واحد صبح عليك وانت معكنن على الصبح بتلعن ابو الي خلفه……إذا حد جاب سيرة واحد بتحبه ممكن تطعميه قتله، فما بالك لما تحكي عن دين أو سياسة أو سادة……إحنا إرهابيين خلقة ومهما عم نحاول نظهر بالمظهر الحضاري للمدنية، تضل حلولنا هي حلول لا تخلوا من الإرهاب سواء فكري أو ملموس.

كثير صعب نغيير هذا الإنطباع للغير لأنه مش قادرين نغيره أمام أنفسنا وحتى بتعليم أولادنا والجيل القادم، أقل كلمة تهديد علشان تعاقب ولد بتقله …..والله لأدبحك…..والله لأقتلك؟؟؟؟

لا يخلو نقاش فكري من تهديد أو إستخفاف، لا تخلوا مشادة بحارة من جرحى ويمكن قتلى، حوادث سيارات بسيطة بتنتهي عنا بجرائم قتل، نزاع على ملكية أرض بروح فيها عشائر كاملة، زواج مسلمة من مسيحي أو العكس بتنقلب غزوة وبنزل الله على الأرض فيها مليون مرة، وكل هذا بنرجع بنستغرب ليش احنا اكثر شعوب العالم الي لزق فينا وصف الإرهابي؟؟؟؟؟ لأننا إرهابيين بالفطرة، والفطرة متوارثة، متوارثة من طبيعة المنطقة منذ الأزل كصحاري وقرى مقطوعة، وهذا الأزل أورثنا العادات والتقاليد والدين، والعادات والتقاليد والدين ما حد عمل الهم update من يوم ما نزل أول ڤيرجين إلهم……كل الي صار انه غيرنا الكوڤر، بس ضل نفس السوفتوير TAYASEH.0، وهذا السوفتوير ما في مهندس بيسترجي وحتى لو عارف كيف يغيره، يغيره، لأنه رح ينزل عليه كمية إرهاب، الله ما بخلصه منه…..لذلك بدنا واحد كاميكازي عربي يغير ويفجر حاله بهيك تغيير (يعني برضه مطلوب إرهابي علشان نتغيير!!!!!)

الجوهر والمظهر

الجوهر والمظهر…..
ملاحظة مهمة جداً، كيف كل الدول اليوم التي بالنسبة لنا دول متحضرة وجميلة وبنتمنى تزورها أو نعيش فيها، تركوا التراث تبعهم من ناحية اللبس والعادات والتقاليد وقدروا يتطورا ويطوروا التراث والعادات والتقاليد لتصبح عصرية ومتناسبة مع تطور التكنولوجيا وسرعة الحياة الجديدة……
يعني علشان أشرح بشكل أزبط، محلات البيتزا في إيطاليا، غيرت الفرن القديم، غيرت الشيڤ الختيار “أبو تمبة”، غيرت الست الطليانية إلي بتخدم وغيرت كراسي الخشب القديمة، وإبريق المي القديم ……بس ما تغير طعم البيتزا؟؟؟
الأوتيل إلي كنت قاعد فيه “أنا وأنجلينا”، عمره ٦٠٠ سنة بلا مؤاخذة أكبر من المملكة الأردنية الهاشمية وكثير من دولنا العربية……تغير الحمامات وصارت عصرية، أضافوا مصعد إله، عملوا بار، عملوا مطعم على التاراس، بس اللوحات إلي على الحيط، هي نفس اللوحات إلي على الحيط إلي كانت موجودة لما بنوا المبنى أصلاً، غير طبعاً المنظر العام إلي فعلياً هو هو من ٦٠٠ سنة لغاية كمان أظن ٦٠٠ سنة لقدام!!!
هون الفرق، نحن بنحاول نحافظ على الجوهر بعاداته وبدائياته وإنتهاء صلاحيته وبنلعن أبو المظهر بالكامل وبنعمله عصري لأبعد حدود بس للأسف بضل الجوهر تبعه قديم بقدم عاداتنا إلي ما تغيرت من آلاف السنين، وبالتالي تحضرنا وتطورنا ظاهري ومثل البيت الزجاج حجر صغير بيكسره وبيبقى معنا البدائية في العادات والتقاليد فقط!!
علشان هيك مش عم نقدر نلحقهم بالتطور ودائما بنلوم الإقتصاد والقوانين والعلم، مع إنه إحنا برضه عنا إقتصاد في كثير من دولنا أحسن من اقتصادهم، عنا علم بكميات وعنا قوانين برضه مشابهة، بس الشيئ الوحيد الي ما عنا إياه هو تطور الجوهر حتى يتماشى مع المظهر……..#بس بقول!!

رقص شركسي

أنا زلمة مش عنصري نهائياً بأي شكل من أشكال العنصرية، ودائماً بنتمي لأي فئة بلاقي فيها جمالية أو شكل من أشكال الفخر سواء كانت عربية أو أجنبية أو حتى سريلانكية!!
من كم يوم إنعزمت على عرس شركسي لأول مرة، وشفت رقص شركسي من الشباب والبنات، خلوني أتمنى أن أكون شركسي، قد ما فيه من عنفوان وفخر ورجولة وأنوثة وتراث جميل جداً…..
إستغربت كيف إحنا في الأردن، بوجود الشركس وهم تقريباً أقدم من جميع الأعراق اللاحقة إلي سكنت الأردن وأصبحت أردنية……إستغربت ليش بنرقص بأفراحنا ومناسباتنا رقص عربي بخلي الشب زي البنت بميلان خصره ودلعه وما بنعتمد الرقص الشركسي؟؟ حتى الدبكة – دبكة بلاد الشام – ما إلها معنا عنا كون باقي بلاد الشام بيرقصوها أحلى منا! وحتى إستغربت ليش بنسوق حالنا تراثياً من خلال رقصة “الدحية” (زياد….الله ستر إنه رحمة الوالدة شركسية، فعلي الأمان وخلي هالبنت عندكوا :)) إلي لا لها طعم ولا لون ولا تتتمدد بالحرارة ولا تنكمش بالبرودة!!!!
الشركس (برضه مش حدا يفكر إني عم أحاول أزبط بهالحكي وحدة شركسية)، جزء أساسي من الأردن، جزء جميل ومش موجود إلا قليل منه في العالم العربي (يمكن عنا بس)، جزء أصيل وجمالياته أجمل بكثير من ال براندينغ الموجود للأردن في العالم، ويمكن أن نعتمده كرقص شعبي وتراث أردني معمول من الجميع، يعطي جمالية عظيمة للجميع!!!! تشركسوا ولا تتدحييوا حتى ولو لم تكونوا شركسيون……

Armenia

Thought of The Night:

I will light a candle for Armenia on this memory, but i will light a 1000 more candle for the chance of having them between us as a very beautiful element in our Beautiful Levant…..

Բարի գիշեր եւ հաջողություն. (Good Night and….Good Luck!)