سوقيني عشقاً….

سوقيني عشقاً….

بتبدأ تحس بالألم في معدتك لما تقرأ خبر مثل هذا من جهابذة التشريع في العالم العربي بالإضافة لكل الآلام الآخرى – بالفتحة – لجميع الجهابذة في دولنا العربية، وتفكر قديش مضيعة للوقت أن الواحد يضيع وقته بين أنظمة هبلة قلباً وقالباً، بالذات لما تقرأ مثلاً إنه أحد البنود للهبة السعودية للمرأة هناك، إنه على الويك إند، مسموحلها تسوق من الساعة ١٢ للساعة ٨ مساءً فقط….،،(طبعاً لأنه الريّال بكون معطل ولا بد أن يسوقها للبغلة الي عنده قبل ما تسمحلها الحكومة تسوق…..)……وفي ناس هللوا للقانون وقلك بداية الألف ميل خطوة ….خطوة تخش بمؤخراتكم (شفتوا كيف ما قلت بطيازكم هالمرة 😜)

*بنفس الوقت الي تناقش فيه هذا المشروع وفي كوكب آخر على ضفاف التايمز الهادر، تناقش مجلس العموم البريطاني خلال الشهر الماضي على طريقة لإنقاذ التأمين الصحي للدولة البريطانية، وتمخض على نقاشه عدة بنود، لا زالوا يطرحوها للوصول لأفضل قانون لحماية الشعب البريطاني في المستقبل القادم، ومنها:
١- تجريم شرب الكحول للحامل….يعني الي بتشرب كاسة نبيذ خلال الحمل، ممكن تلاقي حالها بالسجن كونها عم بتضر مواطن بريطاني – قادم – صحياً
٢- قانون تعليم تفريش الأسنان في المدارس، وبالتالي بخففوا علاج الأسنان على حساب الدولة
٣- قانون منع التدخين في الحدائق….نو تعليق!
٤- حوافز للموظفين الي بخفضوا وزنهم، يعني البقرة الي عنده ضغط وكوليستول، إذا بخفف وزنه الدولة رح تدفعله مصاري (أكيد أقل من قيمة علاجه)
٥- الشباب الفقراء ورواتب للعيش مع العجايز في بيوتهم علشان يديروا بالهم عليهم (تو عصفور ويذ ون ستون)
* طبعاً ما في مقارنة بين البرلمانات….المقارنة هي إنه إحنا عم نتناقش على شو والكواكب الأخرى (بالضمة) عم تتناقش على شو؟!

البقرة الي بالسعودية ناقص بس يركبلها إسوارة إلكترونية علشان يعرف وين مكانها، والبقرة الي عنا قلقان على صحته وتقاعده أولاً والباقي طز فيه، وكمان البقرة اللبناني “مدد” لحاله “ديمقراطياً” وأصبح أول ديمقراطية ديكتاتورية إشتراكية في العالم كله……

#صباح_التفوووووور_على_الديمقراطية #الديمقراطية_رجسُ_من_عمل_الشيطان

http://www.sawaleif.com/Details.aspx?DetailsId=132724#.VF1KkK-6Qg8.facebook

مستحيلات

رابع المستحيلات……
الثلاث المستحيلات إلي قبل هما، الغول والعنقاء والخل الوفي، وطبعاً هدول كانوا مستحيلات لما كان التلفزيون أبيض وأسود، والكافي شوب هي درج العمارة أو رصيف الشارع، وبرابيرك نازلة ماكنتش عيب…عادي، وتلفون البيت كان القرص الدوار إلي ياما علق أُصبعك فيه، وما كان نعرف غير فريق الحارة وهو كان على مستوى اليوم أهم بكثير من برشلونة، وصح النوم كانت قمة فهمنا السياسي هذا إذا قدرنا نعرف ماذا يجري في البرازيل علشان نعرف ماذا يجري في الصومال……..
اليوم، تغير الوضع من كثر الرضع، والمستحيلات كمان تغيرت وصارت:

الغول: حالة هستيريا غريبة كل ما يلعب هالفريقين:
١- إنه تمرق مباراة لبرشلونة ومدريد بدون ما أعرف إنه أُمك وأُختك وخالتك وجارتك برشلونية أو مدريدية وبدون ما أشوف النتيجة كُل ثانية وبدون ما أشوف تحليل أهلك عن الضربة إلي ضربها ميسي، في الوقت إلي علاقتك بكرة القدم لا تتجاوز متابعتك لحلقات كابتن ماجد بنفس الوقت إلي برابيرك كات تنزل على تُمك وتطلع إنه ما حدى شايفك وتأخذ لك لحسة ذوق جست فور ذا هيك أوف إيت إو لأنك مقلعط من يومك………
العنقاء: حرقوا الواتس أب بخمس دقايق بعد ما كانوا بيعبدوه وطلع من الحريقة البي بي إم:
٢- إنك تلاقي عربي خلال الأسبوع الماضي ما بلغ الدنيا ومن فيها برقم ال BBM تبعه…..يا أخي ما بدي أببملك، خاوة هي القصة؟؟ وأنا أصلاً ما رديت على واتس أبك ولا على إيميلك ولا على بوكاتك ولا لايكاتك ولا حركاتك، فليش تقلعطني برقم بي بي ……..إمك “بلا قافية”
الخل الوفي: إلي حبوه كرهوه وإلي كرهوه حبوه….يا لهوي:
٣- إنك تلاقي مصري بحب باسم يوسف ماسبش على باسم يوسف لأنه صار إخوان ومصري ما بحبش باسم يوسف ما سبش على باسم يوسف لأنه من جماعة السيسي…..بعد مشاهدة نفس الحلقة؟! أظن لازم يعمل حلقتين بالأسبوع (الجمعة مع السيسي والثلاثاء مع الإخوان، علشان باقي العقل إلي عند إخوانا المصريين ما يضربش)

ورابع المستحيلات عن جد عن جد، إنه سعودية تسوق سيارتها بالبرقع، إحنا إلي عنا بلا برقع والشباب ماشيين حراسة حواليها وتفضلي يا أمورة والذوق كله علشان تمرق قبل، وداخلين ومدخلينا بالحيط؟!
طيب ماشي رح أكون مع جمعية الدفاع عن المرأة وأقول مُش مستحيل، بس بشرف الغالين عندكم تخيلوا……الدنيا ليل، ما في ضؤ بالشارع، سيارة سوداء، وباتمان سايق سيارة قدامك؟؟؟ لا غول ولا عنقاء ولا خل وفي ممكن يعمل معك شي بهالحالة….

(في كمان سابع المستحيلات على فكرة بس هاي إلها حلقة خاصة: إنه دولة عبدالله النسور طلع بشقلب الكلام من وهو صغير، وكل ما كان يقول إرفع، كان يكون قصده …….نزِل!!!)

راقي بقيادتي

راقي بقيادتي…..
والله حلو هذا الإعلان لذيذ وغير تقليدي بالذات عنا في الأردن التي تخلو من الإبتسامة تقريباً لإرتفاع أسعار الإبتسامة في البلد……
إمبارح وأنا عم أتطلع على البوستر المرشوم بكل شوارع عمان والموجهة فعلياً للصائمين، كون تعليق البوسترات تمت خلال شهر رمضان، وكونه الحملة أصلاً معمولة من وزارة الأوقاف الأردنية، وليس من دائرة السير يعني، وصلت لهذه النتيجة!!!!
عزيزي الهابي فيس إلي على البوستر، بصراحة إنت الوحيد إلي راقي بقيادتك فعلياً، بغض النظر إنت سائق عن جد ولا بس بوستر ………
إنت الوحيد إلي بغض الناظر صايم ولا فاطر، إلي على صباحك إبتسامة جميلة……

أما بخصوص، أصدقائك السائقين، فإليك التقرير التالي من واقع الحدث:
– جميع من يقود سيارة، أو حمار، أو ماشي على رجليه……غير راقي لا من قريب ولا من بعيد!!
– جميع من يقود سيارة، أو حمار، أو ماشي على رجليه…..عبس يعبس فهو عابسسسسس!!!
– جميع الصائمين، ضغطهم مرتفع، وركض ركض، ومعصبين، وشايلين طاجن ستهم….حتى بعد الإفطار!!!!
– جميع الفاطرين، على فكرة معصبين أكثر من الصائمين ، كونه لا عارف يدخن ولا يمضغ علكة، خوفاً ما يأكل قتلة زي الزلمة إلي بالزرقاء إلي إنمسك وهو فاطر

عزيزي الهابي فيس، والله، كثر الله من أمثالك إنت شخصية راقية جداً ……شكرًا إلك، بس إنت مش عارف إنه لا حياه لمن تنادي، وعلشان تنجح حملتك وتقلب السائق الغير راقي إلى سائق راقي، إبتسامتك لا تكفي يا عزيزي!؟ دخل معك على الحملة دائرة السير لأنه الرقي حقه مصاري، وإذا ما دفعت الناس ثمن عدم رقيها، رح تضلها مش راقية وبس تتطلع على البوستر وتقول ياي شو حلو، وتضلها فعلياً ……مش راقية

طوووووط……بيييييب

لسة تيس (L)
هاي إل (L) إلي مكتوبة على سيارات تعليم القيادة في كل العالم، وإلي عنا في الأردن تحورت وترجمت بالعربي ل (لسة تيس)! لسة تيس في الأردن اليوم لازم قانوناً تنكتب على أكثر من ٥٠٪ من السيارات ومش بس سيارات التعليم، لأنه لسة أصحاب هاي السيارات (أجَلَكُمْ الله) …….تيوس وبقر وحمير ودواب!
رح أقولك ليش لسة تيس:
– لما تفتح الإشارة وقدامك زحمة ما بيصير تتحرك وتسكر نص الشارع، خليك محلك، لحد ما يصير عندك مجال!
– لما تعمل غماز، إعملوا قبل ما تلف، مش وإنت عم بتلف!
– لما تكون الأولوية لإلي، ليش بتطاحش وبتعمل حالك مش شايفني، ولما ما أخليك تمر ليش بتطلع علي شزراً كأني سرقت منك؟ وبرضه ليش لما أخليك تمرق، فجأة بتصير خلوق ومحترم وإبتسامتك بتغرقني …..إبتسم من الأول وإستأذن، والله بمرقك بمزاجي يعني!
– إذا بدك تمشي على رواق، إمشي على المسرب اليمين، لأنه دائرة السير لسة ما طوبتلك المسرب الشمال بإسمك!
– وأخيراً، إستعمالك لزمور السيارة (هاي ركز معي فيها، لأنها مجلد لحاله):
ولا، يا أهبل، والله بدك قص ايد! يا زلمة صرعتنا هبلتنا دوشتنا، يا زلمة كرهتنا السيارات وأبو كارل بنز الي اخترع اول سيارة. شو هذا النقص الي عندك للفت الانتباه، وإذا مش نقص شو هالموعد العظيم الي متأخر عليه، عطوفتك! ولا مثلا طيارتك الخاصة جاهزة للإقلاع يعني واحنا مأخرينك؟ وبعدين انت شايف الشارع واقف و٥٠ سيارة قدامك، فكرك لما يسمعوا زمورك رح فجأة يختفوا وتقدر تمرق؟ ولما تفتح الإشارة وتبدأ تزمر، الباقي مثلا عنده عمى ألوان وما عرف أنها صارت خضرة!.

ما رح أقولك بلاش، وعيب وما بيصير – لأنك هون شوي صعب تفهم بناء على طفولتك لما كنت تمد أيدك لقدام وتقول طوووووووط على أساس انك سائق، فصعب أغير عقيدتك انه السواقة عبارة عن زمور طويل الأمد -، بدي رجاء من دائرة السير انه تعمل مخالفة استعمال زمور بغير محله على الأقل ١٠٠ دينار، ورجاء من مصنعين السيارات ومصدرينها للعالم للأردن يعملوا شغلة انه الزمور ما يشتغل إذا السيارة ماشية تحت ٢٠ كلم أو واقفة لانه فعلا ما بكون الهم داعي!

فهمت ولا…….لسة تيس؟