أزمة…..ذكاء!
أكيد ما عنا أزمة أخلاق بالبلد، لسة في شوي، بس الأكيد إنه عنا أزمة ذكاء، وكمية الغباء تفوق منسوب المياه في سد الملك طلال بعزها…..
غباء، لما تطلع بالسيارة تتمشور بالمطر على الفاضي وتزيد العجأة عجأة
غباء، لما تطاحش بالسير والسير مسكر والطريقة الوحيدة إنه يفتح، هي لما تبطل تطاحش…..
غباء، لما الطريق مسكر وتبدأ تعزف لحن الخلود بزمورك على أساس رح يفتح هيك…..
غباء وإستغباء، لما نوڤمبر كل سنة بتشتي بغزارة، والأمانة تقول …..تفاجأنا بكمية الأمطار
غباء وإستغباء، لما تكون عارف إنه طمم وحصمة المقاولات هي السبب الرئيسي لإنغلاق المصارف، ومع ذلك ما بتخالف المقاولين الي بيتركوا طممهم بعد ما يخلصوا….
غباء وإستغباء، لما تكون عارف أنفاقك رح تغرق، وما تسكرها إحتياطاً بيوم المطر…..
غباء وإستغباء، لما يصير في تكنولوجيا بإيد الجميع بتقدر تعرف إذا في مطر ومدته وكميته، ولسة بتذبهل وبتعمل قصة من الموضوع……
منيح الي الأردن ما فيها زلازل ولا براكين ولا أنهار وسدود ولا حيوانات متوحشة (غيرنا)، ولا تقع على المحيط الأطلسي، والله يديم علينا المطر ويخلصنا من البقر آمين يا رب العالمين…..
ملاحظة: راح علي موعد كثير مهم إمبارح مع إني طلعت قبل بساعة وما وصلت على الموعد بعده بساعة وروحت بعد برضه ساعتين…… ٤ ساعات من دابوق للثالث والعكس إلهي ألكسا تنتقم منكم آمين (لو مش مطر كنت طلعت على الڤيزبا رضي الله عنها)😜