ڤينيسيا

(برضه بكير لأني مسافر…..)

ڤينيسيا….
بلد بنت كلب بحلاوتها، وغرابتها وجمالها بكل المقايس، بس طبعاً أحلى ما في الموضوع إنه ما في سيارات وعجقة السيارات!!
تكسي بحري، باص بحري، شرطة بحرية، سيارات إسعاف بحرية، وكله ماشي حسب قانون البحر والبحارة. الحلو بهذا الموضوع إنه مافي مطبات غير الموج، مافي إشارات مرور، مافي تخطيط شوارع، مافي دواوير ومافي مخالفات ورادارات، ومع إنه الطليان معروف عنهم سوء القيادة والفوضى بشوارعهم الإسفلتية، بس بالقنوات البحرية في ڤينيسيا ملتزمين بالنظام إلي مش موجود…..نظام مبني على غرائز البحار وخبرته بالتعامل داخل هاي القنوات وإحترامه لحقوق البحارة الأخرين وإحترامه للطرق إلي أصبحت طرق من واقع تاريخي وليس من واقع تخطيطي.
نقطة كثير مهمة إنه نفس الطلياني أبو عجقة بالشوارع الإسفلتية المنظمة، هو نفسه الطلياني الرائق الهادي في الشوارع البحرية الغير منظمة، خلاني أفكر بجد……مش يمكن هاي مشكلتنا؟؟؟
نحن شعب قريب على الطليان بعجقتهم وعصبيتهم وعدم إحترامهم للأنظمة ومحاولتهم دائماً التعدي على حقوق الطريق ونرفزتهم…….مُش يمكن يزبط وضعنا أكثر لو شلنا معالم النظام المروري عنا وخلينا الناس ترجع تسوق بالشوارع زي ما كانوا يسوقوا الحمير زمان في القرى؟؟!! معقول نزبط من واقع الصح بيزبط مع الصح والغلط بيزبط مع الغلط؟؟؟؟؟؟؟؟؟
طبعاً لأنه صعب حتى نجرب طروحات مختلفة عن الطروحات والحلول إلي تعودنا عليها، ما رح نعرف أكيد إذا الطريقة الڤينيسية البحرية ممكن تجيب نتيجة عنا أو لأ، بس طالما صعب نجرب، خلينا ندعي السنة يجئ مطر أكثر من السنة الماضية على عمان لما سكرت الشوارع والأنفاق وغرقت السيارات، على شرط إنه نخلي ألمي هاي السنة بلكي تحولت عمان ل ڤينيس جديدة وإجى الحل من عند الله بدون تدخلنا…….ولو برضه ما زبط، وقتيها بنقدر نرجع ونقول ……..الحق على الطليان!!!!!

العودة إلى الصحيح

العودة إلى الصحيح،
صديق فيسبوكي، قارئ لما أكتب، بعتلي رسالة على على الفيس بوك دعوة شخصية لي ولعائلتي لتناول الفطور معه ومع عائلته! أنا ما بعرفه من السابق شخصياً ولكن قبلت الدعوة فوراً وبالموعد حضرت زوجتي والأولاد وإتجهنا على حي الأرمن في عمان القديمة لمنزل الصديق!
في الطريق زوجتي مستغربة إنه كيف أقبل عزومة أشخاص ما بنعرفهم ومن خلال الفايس بوك…..بنتي، قالت لي بابا كيف بدنا نروح؟؟ بلكي بدهم يقتلونا ومعمول كمين إلنا :))) …..(أولادي إلي أقل من العمر القانوني للتلوث الإجتماعي إلي لحق زوجتي وبنتي، كانوا مثلي مبسوطين ومش فارقة معهم حتى لو كان كمين) :)))
تعرفنا وإستمتعنا مع عائلة الصديق في أحد أقدم بيوت عمان مبني منذ ١٩٣٦ ومطل على جمال عمان بوسط البلد والقلعة وسقف السيل وتعرفنا على بعض من تاريخ عمان الجميل من شخص جميل هو وعائلته، طلع ما بدوا يخطفنا ولا عملنا كمين غير كمين المناقيش والحمص والفول، وكمين الضيافة الأصيلة والعلاقات الطبيعية التي نفتقدها اليوم وأوخذنا بعلاقات المصالح وعلاقات المظاهر الإجتماعية المبنية بتركيبة لم تكن أبداً نفس العلاقات التي تربينا عليها في صغرنا.
بنتي بتقولي…..على الحساب، ما إنتوا علمتونا دائماً ما نحكي مع الغربا وما نحكي مع ناس ما بنعرفهم على الإنترنت ونكون علاقات……يمكن صح ويمكن غلط، ويمكن المواقع الإجتماعية بعدتنا عن طبيعتنا وخلت كل واحد صديق لكمبيوتره فقط وبدأنا نقيم الناس بناءً على صورة البروفايل والأصدقاء المشتركين، بس يمكن لازم نبدأ نتعلم من صديقي الجديد جورج قموة، ونتعلم من صديقه الجديد هاني دحلان، كيف نبني حياة واقعية في ظل الحياة الإفتراضية إلي كلنا أصبحنا مسجونيين فيها اليوم!؟

شكرًا جزيلاً جورج وداليا على الدنيا إلي إنتم منها، وشكراً جزيلاً للوالدة كمان على المقدوس (يسلموا إيديها)…….وعلى فكرة، ولا صورة مقدوس على الفايس بوك قد ما حطيت لايك عليها ممكن تستطعم فيها جمال طعم مقدوس الوالدة ….وهون الفرق الكبير بين الصداقات :)))

على الحبل

على الحبل ….
نفسي أفهم شو موضوعنا، إحنا شعوب العالم الثالث وتحديداً نحن “وأعوذ بالله من كلمة نحن”، شو موضوع إنه نلبس كل الي على الحبل بما فيه الألاميس والذهبات لما نكون مسافرين من بلد لبلد……ليكون مفكرين حالكم مسافرين على التايتانك الجوي مثلاً!!!
شو الحنكة من البدلة والغرافة والشنطة السامسونايت ٣x٤ ؟؟؟ شو الحنكة من الشكشكة بالمجوهرات وإنتي حتى قاعدة “إيكونومي”؟؟؟ يعنى أنا حلمي يكون عندي طيارة خاصة، بس علشان أسافر بالزلط بدون قيود قماشية من أي شكل……
هاي فعلاً مشكلة ثانية (هو كل واحد حر بحاله طبعاً) بس هذا كله محاولات إثباتية للعالم الي ممكن تشوفنا إنه إحنا مهمين، أو يمكن بحالة الشباب إلي معي على الطيارة اليوم “مطقمين” وشكلهم كاينين في بعثة على حساب الدولة، نوع من الإثبات للدولة إنه هينا لابسين بدلنا وعملنا الشغل المطلوب بتمثيل الأردن ك بِدل وغرافاتات حكومية!!!!!!
الزلمة إلي صورته من كم يوم وإحنا بنلعب غولف ولابس زهري من فوق لتحت، على فكرة رئيس شركة بتهز هز العالم كله، ودخلها تقريباً يوازي ميزانية الأردن وسوريا ولبنان ومصر وحط كمان ٤ ، ٥ دول معهم……..لما ودعنا وكان مسافر برضه على ولاية ثانية……كان لابس إِخْضر ….الله يجعل طريقة خضرة وين ما يروح ووفق عقله وما أشوفه يوم لابس بدلة يا رب أمين ……