خطبة الجمعة – هوليجرام

خطبة الجمعة – هوليجرام
إستقيموا يا معوجين……..
يا رب أروح على الجنة، بس علشان أفهم كيف اليابانين “وإشمعنى” ، هما بس إلي هيك الله خلق تركيبة مخهم!!!
عم أطلع على تقديمهم للعطاء لكسب موضوع كأس العالم ٢٠٢٢ (إلي خسروه لصالح دولة بقر…سوري قطر)، وهبلوني يا جماعة بطريقة تفكيرهم!!!
يعني إنسى التكنولوجيا وكيف عاملين هوليجرام، بينقل الألعاب داخل الملاعب في أي بلد وهم عم يلعبوا في اليابان (يلعن أختهم، أنا كتابةً أشرح شو إلي عاملينه، مش قادر، فما بالك نعمله!!!). بالعادة الدول، هيك مناسبات بتدخل فيها علشان بتعرف قديش رح يجئ عليها دخل لما الناس تزور بلدهم خلال هاي المناسبة….هدول عم بسهلوا للناس إلي ما بتقدر تسافر عندهم، إنه يحضر المباريات، بدون سفر وتعب…..يعني زي ما تقول بحبوا يساعدوا الناس بطبعهم كيابانيين!!!!

طبعاً، عقلي المضروب وخيالاتي الهبلة، خلتني أكتب هذا الموضوع بخطبة الجمعة، لسبب مشابه ولكن ديني مش رياضي، وأنا ما عم أقول لازم نعمل هيك، أنا بس عم أستفسر من علماء الدين والمعرفة المسلمين والمسيحين، إذا مثلاً، إستعملنا هذا الهوليجرام (أستغفر الله العظيم)، بنقل الكعبة والقدس وكنيسة القيامة وكنيسة المهد مثلاً، في كل دول العالم خلال أوقات الحج والمناسبات الدينية، علشان الغير قادر على السفر لتأدية مراسم الحج والزيارة، لأسباب مالية أو سياسية أو إحتلالية (للقدس ومكة كنيسة القيامة وكنيسة المهد) يقدر يعمل هيك من بلده بدون الحاجة للترجي من هذا ولا هذا.
بصراحة هذا الموضوع كثير مهم، لأنه ما بتشوف مسلم، إلا بقولك نفسي قبل ما أموت، أصلي بالقدس أو أحج إلى مكة، وما بتشوف مسيحي إلا بقولك نفسي أزور كنيسة المهد…….

بعرف …..بعرف…..قبل ما تبدأوا وتسبوا وتقولولي حرام وحلال……

اللهم إهدي عبدك هاني دحلان، وإستغفرله من شطحاته الڤودكاكية، وثبتوا على دينه يا أرحم الرحمين يا رب العالمين……آمين!!!!