مول فكري…
بتعرفوا؟؟؟ الأفكار المختلفة مهمة للتطور البشري، ومعارضة فكر أو الموافقة عليه خصوصاً في الصفحات الإجتماعية، هو فعلياً أجمل أنواع النقاش كون الواحد لا بعلي صوته ولا بجعر علشان يثبت رأيه ويمكن تكون هاي الطريقة الوحيدة للعالم العربي انه يتحضر بالنقاش ويفهم الرأي الأخر بدون ما يطقلوا عرق!!!!
انا بشبه الكتابة على الصفحات الإجتماعية من قبل “المتعنجهيين والفوقيين” مثلي (هاي مسبة جديدة أجتني 😜)، بالزبط مثل ما تروح على مركز تسوق (مول).
انت بتدخل على المول ويتلف على كل المحلات الي هناك…..شي بيعجبك وشئ ما بيعجبك، وممكن شي يعجبك وتظل ترجع تشتري منه، بس ولا يمكن إنك تدخل على محل بالمول وتقول لصاحبه (مش معقول شو بضاعتك زبالة)!!!!! إذا ما عجبك المحل والبضاعة الي فيه، رح تسحب حالك وتطلع بدون نقاش ولا مسبات لأنه البضاعة مش حلوة!؟
النقاش على الصفحات الإجتماعية هو قمة النقاش للعالم العربي اليوم بدون مؤثرات جانبية أو تأثير فكري جماعي لأنك عم بتجاوب على راحتك (يمكن وانت بالحمام مثلي)، ومش حواليك ناس ممكن تستحي تقول رأيك قدامهم أو توافقهم لأسباب معينة؟!
شوي شوي رح نوصل للمول الفكري الي ممكن ندخل عليه ونشتري الي بناسبنا ولو ما ناسبنا نطلع من المحل بكل هدوء ويا دار ما دخلك شر…..
٩٠٪ من الخطابة والمقابلات التلفزيونية إذا بتلاحظوا، فعلياً بكون فيها مؤثرات بتخلي الواحد يِحمق ويفقد توازنه الفكري لأنه مش على راحته، أما هون…….أنا وبنات أفكاري بالحمام (يا عيب الشوم)، متسلحين بالأي باد وما يستفيض به عقلي الباطن من قصص وحكايات أتحفكم بها، أنا “الفوقي” صباحاً ومساءً 😜
فيضوا وأستفيضوا ولا تعلموا عقولكم الكسل، وتذكر ما تسأله الأم اليهودية لإبنها كل يوم…..هل سألت سؤالاً جيداً اليوم؟؟!!!!!
Abu Alnoon 