إبحث عن إنسانيتك أيها العربي، فقد تم إختطافها…

“إبحث عن إنسانيتك أيها العربي، فقد تم إختطافها”……

بعيد عن السياسة والأنظمة والمؤامرات …..
شعوباً، قبيح ما حدث على مدار ٥ سنوات ماضية، وأكيد قبيح ما حدث قبله، وأقبح ما يحدث اليوم وما سيحدث غداً…
قبيح القتل والدمار والظلم والفقر والقهر، وأقبح أكثر الإنتقام والتشفي والخلط بين الجناة والضحايا
قبيح أن نفقد إنسانيتنا إختيارياً عندما نفقد إنسان (المفروض تزيد إنسانيتنا)، وأقبح، أن يفقدونا هُم إنسانيتنا…

صار لي ٣ ايام ما كتبت إحتراماً وحداداً لمعاذ الي المفروض الكل كان يحترم موته وأقلها ما يتناقل ڤيديو الحرق…ولكن!
كنت بس عم بقرأ تعليقات الأصدقاء والأحباب والمعارف وما ملكت أيماني من تعليقات ناس ما بعرفهم، وبصراحة صابتني حالة إشمئزاز من هول الفِكر، وما كان عندي نفس أكتب شيء….كنت عم بقرأ كيف من السهل أن نتحول من ضحية، لشهية مفتوحة وعطشانة للدم…..من إنس إلى شياطين…..من مسالمين لقارعي طبول حرب، وتفاجأت بكمية الإنقلاب النفسي والعقلي والعاطفي الي صار عند كثير من المطالبين دائماً بالرحمة، من الي قاموا على قانون الإعدام لما رجع، من المدافعين على الحريات، مِن من يتغنى بالتعايش، مِن من ينادي بالديمقراطية….إنسطلت من كيفية تأثير الإعلام والفكر العام على فكر الفرد، وكيف يُغلق العقل، لما العقل العام العاطفي والميديا يسيطرون على الجو!!!

شو إختلفنا عن داعش خلال الثلاث أيام الماضية؟ شو إختلفنا لما طالبنا بإعدام ساجدة “ثُم” إحراقها؟ شو إختلفنا لما بررنا غلطهم حسب التفسير الديني الي على هوانا، مثل ما هما ببرروه بالتفسير الديني الي على هواهم؟؟ شو اختلفنا لما كفرنا فكرهم، مثل ما هما بكفروا فكرنا (مع انه الفكرين غلط أصلاً)؟؟ شو الفرق، لما حطوا مكافأة على طيارينا، وإحنا حطينا مكافأة على راس البغدادي؟؟ ليش فجأة، عم بنمجد مجلس النواب الأردني على رد فعل أقل ما يكون، أمام غباءه الي هو جزء من ما وصلنا عليه -، ليش ننافق هدول بالذات إذا ولا بد ننافق – وليش بنفس الفجأة قمنا على هند الفايز الي ما حكت غير “وجهة نظر صحيحة”؟؟ ليش فجأة، عمر أديب المنافق وفوكس نيوز الصهيونية يصبحوا رموز حرية؟؟ ليش عم بنوجهة الاتهام لمريم المنصوري فجأة؟؟؟ ليش فجأة، إنشغلنا بإذا حرقه كان حلال ولا حرام حسب السنة وإستشهدنا وتناقلنا قصة أبو بكر؟؟ وليش علقنا في بعض أردني وسوري ولبناني وفلسطيني وعراقي وشيعي وسني ومسيحي في هيك موقف؟؟؟ ليش ما سكتوا كلكم وخرستوا لحد ما يبرد دمه على الأقل، إحتراماً لأهله على الأقل (أبوه وأمه وزوجته وإخوانه وخواته الي الوحيدين كان كلامهم مشرف ويعبر عن حزن شديد أمام مهاترات الباقي من الشعب)؟؟؟ ليش ما شفنا نشامى طوكيو ونغازاكي شو عملوا بشهيدهم وما شفنا أخلاقهم وتعاملهم مع الموضوع عنا، مع إنه شهيدهم مدني وشهيدنا عسكري؟؟؟

الفرق واضح وصريح جداً وبعرف ليش أكيد!!! الفرق أن داعش ومن يقف خلفها، إستطاعوا أن ينزلونا لفكرهم المنحط، ولم نستطع التأثير نحن عليهم!!!!!!!!!

كتبت قبل هيك، معاذ رحمه الله طيار حربي، وقدره كُتب من لحظة إنضمامه للقوات المسلحة، وكتبت برضه إنه قدره حُتم من لحظة وقوعه بالأسر بإيد هيك حيوانات، وكتبت إنها مش حربنا للحظة ما نزلت طيارة معاذ، فأصبحت حربنا، حتى بمعرفتي إننا مجبرين بها في ضل السياسة والإقتصاد العالمي، واليوم رح أكتب وان شاء الله ما أرجع أقولكم “كتبت”……لا وألف لا للحرب البرية، وإذا ولا بد منها، خلي الجيش الأمريكي والبريطاني والأجانب الباقيين ينزلوا أولادهم فيها، طالما طيارين العرب هم من يقوموا بالقصف فقط لحد الآن في هذا التحالف الغريب العجيب التركيبة؟

داعش صُنع جهات كثيرة كلها بتعرف بعض وكلها دول كبيرة، وداعش تمويلها تمويل جيوش كاملة على أحدث نطاق وتسليح، ومن خطط، خطط بعناية فائقة، بالإعتماد الكُلِّي على التفكير العاطفي للأمة العربية، وعلى التفكير العصبي….هذه خطتهم فقط ونجحوا فيها جداً…..نجحوا كيف يقلبونا وحوش…..نجحوا كيف يخلونا نتناقل ڤيديوهات قطع روس وحرق ورجم ببرود أعصاب…..نجحوا بإظهار الداعشي بداخلنا بمجرد تعويدنا على صورة القتل، نجحوا بفصلنا وتفتيتنا وتفصيمنا بشكل مُخيف….داعش هي (دول استعمارية عالمية الشيطنة)

العين بالعين والسن بالسن، أقدم قانون بشري، وبهذا القانون دُمرت حضارات، وهلكت دول، ولا غرابة أن الغرب أخذ كل شيء من الشرق، وترك لنا هذا القانون نتغنى به، لذلك إبحث عن إنسانيتك أيها العربي، فقد تم إختطافها، وأصبحنا نُهزم وننتصر ونموت ونحيا، ونعيش بطولات وهمية دونكيشوطية هرباً من الحقيقة….حقيقتنا نحن….الوهمية!!!!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s